Daha.az Şimali Koreyadakı qadağalar haqqında məlumatı təqdim edir.

Şimali Koreyada sosial həyat dünyanın qalan hissəsindən əhəmiyyətli dərəcədə fərqlənən qaydalar və məhdudiyyətlərlə idarə olunur.

Ölkədə bir çox məişət əşyalarının satışı və istifadəsi tamamilə qadağandır. Qərb mədəniyyətini əks etdirən məhsullar, texnoloji cihazlar, dini simvollar bu qadağalar sırasındadır.

Şimali Koreyada “iPhone”, “iPad” və ya “MacBook” kimi “Apple” cihazları satılmır. Yüksək texnologiyalı məhsulların idxalı tamamilə qadağandır.

“Apple” cihazları sadəcə olaraq “burjua lüksləri” kimi etiketlənir və cəmiyyətdən uzaq saxlanılır. Əvəzində ölkə “Arirang” adlanan özünün Android əməliyyat sistemli telefonlarından istifadə edir. Bu cihazlar yalnız dövlət tərəfindən idarə olunan proqramlarla işləyir və internet bağlantıları bloklanır. Hətta dövlət televiziya kanalları da “Apple” məhsullarını təhlükə kimi göstərir.

Qlobal içki nəhəngi olan “Coca-Cola” Şimali Koreyada rəsmi olaraq qadağan edilib. Bu içki mənşəyi ABŞ olduğu üçün qadağan olunmuş məhsullar sırasındadır. Oxşar Çin içkiləri Pxenyanda bəzi yüksək səviyyəli bazarlarda satılsa da, “Coca-Cola” markası rəsmi olaraq qadağandır.

Şimali Koreyada cinsi sağlamlıq məhsullarının satışı da məhdudlaşdırılıb. Bir çox insan prezervativin nə olduğunu bilmir. Ölkədə doğuşa nəzarət üsulları ilə bağlı heç bir təlim yoxdur və onlardan istifadə etmək tövsiyə edilmir.

Cins şalvar Şimali Koreyada, sadəcə, geyim hesab olunmur; bu şalvarlar rejimə görə Qərb mədəniyyətinin simvoludur. Xüsusilə, mavi cins şalvarlar “Amerika imperializmi”nin simvolu hesab edilir və qadağandır.

Ölkə daxilində Qərb üslublu geyimlərin satışı, geyinilməsi və idxalı qəti qadağandır.

Çindən gələn bəzi məhsulların sərhəd bölgələrində qara bazarda satıldığı bildirilsə də, rəsmi olaraq satın alınmır.