600 illik “xəyanətdən qoruyan” qiymətli daş arxeoloqları heyrətləndirdi.

Daha.az xəbər verir ki, Polşada aparılan arxeoloji qazıntılar zamanı tapılan 600 illik qiymətli daş elm aləmində böyük marağa səbəb olub.

Kolno Qalasının xəndəklərində gümüşlə işlənmiş ametist daşı aşkarlanıb.

Bu daşın böyük ehtimalla bir zadəgan qadına məxsus fibula və ya kral tacı başlığının bir hissəsi olduğu düşünülür.

Ametist daşları Orta əsrlərdə xəyanətdən, zəhərlənmədən, kabuslardan, sərxoşluqdan, korluqdan, boğulmadan və pis ruhlardan qoruduğuna görə çox dəyərli sayılırdı. Bu daşlara insanların inamı əsrlərlə davam edib.

Qeyd edək ki, Kolno Qalası 13-cü əsrə qədər uzanan zəngin tarixə malikdir. Qala əvvəllər Brzeg Hersoqu III Boleslavın nəzarətində olub. Həm hersoqların yaşadığı bir məkan, həm də taxta daşınmasının idarə olunduğu strateji bir nöqtə olub. Lakin qala 1442-ci ildə Sileziya daxili müharibələri zamanı dağıdılıb. Daha sonra isə varlı cəngavərlərin əlinə keçib.

Mütəxəssislər tapılan daşın, həqiqətən, ametist olduğunu Raman spektroskopiyası vasitəsilə təsdiqləyiblər.
Bu təsirli tapıntı yalnız tarixi baxımdan deyil, həm də inanc, simvolizm və Orta əsrlərin estetikası baxımından önəmli hesab olunur. Araşdırmalara görə, Orta əsrlərdə zadəganlar ametist daşlarını yalnız gözəllik üçün deyil, eyni zamanda qorunmaq və güc qazanmaq istəyi ilə də taxırdılar.